« Voltar
Nte sto grando mondo da Dio se ghen trova de tut, tuto gira e regira, gnente resta fermo, sempre ghené qualcossa drio cambiar, a ogni dí, a ogni momento tuto se rinova come par rinovare la vita de tuto quanto ghé soto el cielo de color anil. Me póro nono materno, el nono Gigio el ne racontea sempre stòrie, arquante bele, arquante anca brute, de fadiga e de laoro, ma sora tuto par noantri putelóti imparar che ntea vita bisogna laorar e far polito, par che quando ndessen riposar la testa fussa tranquila.
El ne disea che par gaver na vita bona, sana e meritarse el paradiso bisogna rispetar arquante règole. No le fa male a nissun, ma le giuta a vìvere mèio e ve le raconto adesso:
1ª règola - Mai far la ciùca, perche un ciuco el fa cose strambe. El se pentisse doman de quel che’l fa ncoi. El rovina so vita e anca quela de so fameia, portando disgrássia e desilusion;
2ª- mai far na barufa. Quel che barufa el crede far mal ai altri, ma el se fa mal a lu stesso. Col tempo nissun vol la so amissìssia, per tuti cantoni no i lo rispeta pi;
3ª – mai magnar depi de quel che ocorre. Chi magna depi el resta moco e pelandron. No magnar mia spotàci, magnar poche robe e sempre quele, che lora el corpo se costuma, el mantegne la salute e no ocorre mia ndar spender i sóldi coi dotori, ospedai e medissine, peró se ocorre de lori, méio lé ndar in serca;
4ª – mai ciapar piova perche el corpo l’è caldo e se pol ciapar polmonia e altre magagne. Fa fadiga rincurarse. Ne sempre le medissine le ze bone de far ritornar la salute del corpo e te guasterè na sbrancada de soldi, o anca podaré ndar trovar la busa ntel simitéro;
5ª – pregar sempre e ringrassiar el Signor Dio per la vita, per la salute, la fameia, per i racolti, per tuto. Quel che no prega l’è come le bèstie: sensa ànima, el resta vodo come na suca;
6ª – mai dassar de laorar. Laorar fa bene al corpo e l’ànima. Chi no laora resta in afano. Ghe vien sol che bruti pensieri in testa. Col passar del tempo el diventa brontolon, resta strambo o anca el ciapa na sbrancada de malegrássie;
7ª – se te poi giutar i fioi, giuteli. I ze la continuassion dela to fameia, ma insegneghe laorar e no dassarli massa liberi. Tanta libertà pol farli ciapar la strada sbagliada. Qualche tiron de recia fa bene, ntea ora e giusta mesura par farli veder la mèio strada. Se qualche olta ghe vol passarghe la bacheta de stropa ntee gambe, passeghe. Se no te fé cosí fursi te tocará ndar trovarli in prision.
E ti che te sei drio leder, cosè che te par? Le ze verità o te par che sia busie?
Luiz A. Radaelli
|