Come se preghea sti ani

Sti ani, no fa mia tanto tempo cosi, tuti ghe tochea ndar in cesa par la messa tute le domeneghe. Co se sentiva sonar le campane bisognea farse svèlti, netarse, meterse su le mèio veste che se gavea e indrissarse via la cesa. Se’l dea, ndeven confessarse par dopo ciapar la comunion, se no’l dea sempre, ma al meno in tea pascola e tel natale. Bisognea confessarse e far la penitensa, scoasi sempre longa perche i preti ghe piasea darne na mucia de rosari e pater nostri che scoasi ne fea fastidio de tanti che i zera. 

In cesa i òmini i ndea de na banda e le done de nantra. Le done coi vestiti sempre soto i zenòci e i òmeni ghe tochea ndar co la fatiota e el fassol in tea scarsèla. La spòrtola e la ombrela le done se le portea scoasi sempre insième.

Tel pulpito el prete fea la prèdica, longa che no se finia mai, longa come l’an dela fame, ma mi gò idea che la zera un bel poco pi longheta. Nte certe ocasion, le ndea altro che longhe, no le se finia mai.             Tea ora de tor su le limòsine se scoltea lo sciocar dei schèi, quando i òmeni i trea le monete rento la scatola che’l fabricier el portea in man. A quel tempo se preghea par tuto e ghera sempre preghiere tar tute le situassion. Quando se perdea qualcossa se preghea el Siqueris a Sant’Antoni, parchè l’era el santo dele cose perse, e quando se catea la roba persa, se disea che l’era un miràcolo. Fin par el guarir dele bèstie e par spaventar le ànime se preghea.

Ncoi ze tuto cambià. Le cese par che le se svoda e le persone par che le gà perso la tamontana. Sarà che no manca un poco pi de Dio ntea nostra vita? Penseghe su.

                                     Luiz A. Radaelli