« Voltar
El dote dele tose
Go domandà a le none: Ortenila, Gema, Beatrice e Elda, come che lera sti ani’ndrio, quando le tose le ndea maridarse, già che’l mese de magio, tanti lo cognosse per el mese dele nuvie, e che tante tose le speta arivare sto mese par alora maridarse.
Secondo le none, adesso lé tuto moderno, pràtico e fàssile, ma sti ani indrio no lera mia così. Le none le me ga contà che’l rispeto a la tradision italiana lera presente nela magniera de vestirse dele done e tose dea colònia taliana: le veste e i vestiti i zera pràtissi, adatadi ala fadiga dei laori, ma anca con qualche serto caprissio. Le done se vestiva co le còtole, i vestiti e el fassoleto, scoasi sempre de color negro in testa ligà dadrio. Quando le se petenea le se fea el cocòn. I vestiti zera scuri e longhi, coalchuno coi fioreti, e ntei pie, sempre con le scarpe o le sinèle, e la travesa o el grembìiule coi fiorelini, no manchea mai.
Tei giorni de festa le doperea le mèio scarpe o le mèio sinèle, ma in tea stimana, ntel laoro le doperea i zocoli fati de còrro e legno, scoasi sempre de legno de açoita cavalo. Par sora dei vestiti longhi de color scuro, la dona la portea la “travesa” o el grembiule de laoro, de matina a sera, ligà intorno a la pansa, nel punto del botone dea pansa o anca come i disea, el botone dea vita, e sta travesa vegnea fin scoasi la cavìcia, e i dassea sconto le màcie, sbregoni e le parte taconae.
Le done le laorea a casa e anca in tea ròssa, ma scoasi mai le guadagnea un tòco de terra quando le se maridea, parche la spartision lera fata tra i maschi. A le done restea scambiar co le case de negòssi i prodoti del orto, ovi, qualche galina o polastro, spòrtole fate a man con la dressa dea pàia de formento, par comprare qualche ròba par farse el dote. Sto dote lera preparà per la tosa in ani de laoro, de note, nel tempo libero e dòpo aver fati i laori dea casa. Lera tanto modesto: coalche ròba par farse vestiti e traverse, ligno, bombasina par farse ninsoi, fodrete, fassoleti, tovaie e sugaman. Qualcheduna gavea la fortuna de comprarse o guadagnare una màchina de cosire, movesta a man, o col pedale. Pignate, padele, cassarole, pironi, possade, piati, bicieri e altre còse, se le gavea a misura.
La nona Angelina ga guadagnà in tel dote oto ninsoi, quatro fodrete, trè straponte. Una de queste straponte lera de lana de pegora filada intanto che i fea filò, do scarpe col taco, una negra e una zalda, La se ricorda ncora de gaver guadagnà el capoto de lana color de sendre, longo fin metà gamba, fato fare aposta dela sartora, na borseta bianca, quatro vestiti a fiori mescolà color de sendre e rosso, e anca sìncoe traverse. La ga ancora la màchina de cosire Crosley che la ga guadagnà del so pòro nono. So nòno el ga vendesto al so compare Bèpi, do vedèle co la canaula, perche no le stea mai rento el potrer. La nona Angelina la dise anca chel dote dele tose dele colònie taliane lera pòvero ma pràtico, sensa spotàci e anca sensa la stravagànsia che ghé ntei giorni de ncoi.
El mondo lé sempre coelo, le persone lé che cambia.
Luiz A. Radaelli |