PREFASSION Del libro “La strada dela vita” del autore Ary Vidal.

La strada dela vita, de qual vita e de qual strada?

Se pol dir che ze la stòria dela vita e dela strada del Autor.

Ary Vidal el fa strada col laoro dei brassi e del servelo.

Ze la strada dela so vita e la vita dela so strada.

L’è natural che i poeti i parla del imaginàrio e del reale.

Se i parla del reale, i lo parla soto la forma del imaginàrio.

Se i parla del imaginàrio, i lo parla soto la forma del reale.

Quando se dise – Mi son Talian, o noantri semo taliani –

se parte del tempo che scomìnsia da no se sa quando,

che no se sa da dove el vien, dove el va e dove el finirà.

Se parte del identità che se ga in scarsela, nel cor e in mente.

E così sucede, pi o meno, con tuta la gente.

Te la strada dela vita taliana ghe ze e sucede de tuto:

de tuto quel del prima e de tuto quel de dopo.

Del prima e del dopo in forma del presente,

che Ary lo veste de imaginassion, arte e poesia

e lo mete in tola col consiero del amore e dela fede.

Tera ze la tera mia. Fede ze la fede mia.

Nadal ze el mio Nadal, cesa ze la mia cesa!

Cariola, sapa, careton, caretin, zugo de carte,

el cantar, el magnar, el béver, el rider, el cantar,

la festa, el filò e el velório – ze tuto roba mia.

Tuto, tuto ze la stòria del me ieri e del me oncoi.

Ary el se mete in strada come paron de’n novo tempo,

laorador de altri e novi mestieri, studente de altri stùdii,

scritor dei novi tempi, filòsofo de na nova filosofia,

citadin de un’altro mondo, gnanca quadro, gnanca tondo.

El tempo de prima i lo ga doperà so genitori e antenati

par farghe la cuna con paie e scartossi del Amèrica.

Ma el tempo de oncó e del doman lo ga lu in man.

Lo imàgina, lo pensa, lo squara e lo edìfica come el vol.

Se el geri el gavea dei so guai, el oncó li ga anca lu.

Se el geri el gavea la so belessa, el oncó la ga anca lu.

Se el geri el gavea el so viver e valutar le cose,

La so maniera de esser, de far, de viver e de creder,

el oncó el porta insime tuto, tuto come grande speriensa

che del geri, del oncó e doman fa su la vera sciensa!

Ary el se mete tel teatro dea vita de maniere diverse:

a un colpo come uno che pensa, riflete e parla da sol,

in altro colpo, come uno che parla e scolta i pìcoli e i grandi,

e a tuti – ai amissi e ai nemici, ai sagi e ai coioni, sicuro ghe mostra

el camin dela strada che porta a la bela stòria dela vita taliana.

Co la sapa e i brasi par laorar e co idee in mente par pensar,

el ga costruìo la so maniera de parlar, comunicar e insegnar.

El porta vanti el geri e el oncó, al desora dei problemi,

al delà del mondo scuro e nero, fando pi bela la fàcia del mondo,

fando pi lùcida la mente de tuti i so amissi e de tuti i so letori!

Ary, come un contadin del Vangelo, el semena la bona parola,

la fede e la speransa de far la vera e sognata América dei noni,

come fiol del Itàlia, costrutor de’n novo mondo e citadin de tuto el mondo!

Porto Alegre, 1º de julho de 2007

Frei Rovílio Costa