Cari amighi radioascoltadori de ła Radio Brasil Talian inte’l Rio Grande do Sul, Braziłe e inte’l mondo! In cuesto artìgoło parlaremo de ła cołonizasion itałiana inte’l Rio Grande do Sul e anca de ła storia de ła Quarta Colônia.

Cuà, inte’l Rio Grande do Sul, i imigranti i ga scominsià a rivà in 1870, separài in cuatro cołonie de imigrasion. Łe do prime, łe ze stà creà in 1870 e zera ciamài de Conde D’Eu e Dona Izabel, che incò se ga tornà i munisipie de Garibaldi e Bento Gonçalves. Ła tersa cołonia ła ze stà creà in 1875 e zera ciamà de Campo dos Bugres, incò el munisipio de Caxias do Sul.

Ła cuarta cołonia (Quarta Colônia em portogheze) ła ze stà creà in 1876, ma i imigranti soło i ga scominsià a rivà in 1877, e zera ciamà de Silveira Martins, in onor a Gaspar da Silveira Martins, prezidente de ła Provinsia de’l Rio Grande do Sul.  Ła prima baze de ła cołonia zera ciamà de Sità Nova, che incò ła ze ła sità de Silveira Martins. Ła Quarta Colônia ła ze stà creà par el enzenjer José Manoel da Siqueira Couto, par òrdine de’l governo inperiałe.

Ła prima espedision de imigranti che i ga rivà in łe tere devołute de’l governo inperiałe zera formài par 70 fameje, tuti co orizine de ła rezion veneta, comandài par Lourenso Biazus e João Frota. Dopo, i novi imigranti i ga creà altri nucli come: Vale Veneto (1878), Arroio Grande (1879), Ribeirão (1881), Val Verones (1882), Nucleo Norte, atuałe Ivorá (1883), Dona Francisca (1883), Nova Palma (1884) e Novo Treviso (1885). Par fin, i ze stài cołonizài altre tere, che no fazèa parte de łe tere de’l governo inperiałe come Faxinal do Soturno e São João do Polêsine.

Par el decreto provinsiałe nº 1570, de 21 de apriłe de 1886, Silveira Martins ła ga scominsià a far parte de’l munisipio de Santa Maria, come 4º Distreto. Cusì, finise ła Quarta Colônia de’l Governo Inperiałe. In 1898, el teritorio orizinałe de ła Quarta Colônia zera divizo tra Santa Maria, Julio de Castilhos e Cachoeira do Sul.

Tanti risercadori i dize che se el governo gavese creà un novo munisipio inte ła rezion de ła Quarta Colônia, el futuro de ła nostra rezion sarìa nantro. Ma, el teritorio el ze stà divizo tra tre munisipie grandi, che no capìa chi zera cuesti imigranti, come łaorava e che robe piantava, e cusì, sensa suporto połìtego e tècnego, i nostri contadini i ze restài mal ciapà.

Solo dopo ła metà de’l sécolo pasà i nucli de ła Quarta Colônia i ga scominsià a dividerse e se ga creà munisipie. Inco, cuesti munisipie de’l teritorio orizinałe de ła Quarta Colônia se ga asosià co altri munisipie vizin, che no fazeà parte del teritorio orizinałe, ma che par ła prosimità fa parte de’l nucleo culturałe, zeogràfego e polìtego, e tuti insieme se ciama Quarta Colônia. I 9 munisipie de ła Quarta Colônia i ze: Agudo, Dona Francisca, Faxinal do Soturno, Ivorá, Nova Palma, Pinhal Grande, Restinga Seca, São João do Polêsine e Silveira Martins.

Marcos Daniel Zancan

talian@ctism.ufsm.br