Cari amighi radioascoltadori de la Radio Brasil Talian ne’l Rio Grande do Sul, Brazile e ne’l mondo! Prima de tuto, rengrasiemo la Radio Brazil Talian par 'sto spasio, con la finalità de noantri far la publisità de'l laoro de'l nostro progeto e de la Lengua Talian, anca conosuda come Veneto Brazilian. Inte 'sto primo artìgolo ndemo parlar de'l Progeto Talian e de la Lengua Talian.

El projeto de estension Talian el ze stà creà in setenbre de 2017 da'l Colégio Técnico Industrial de Santa Maria (CTISM/UFSM) e el vol far sincue ani de laori de estension de la università rento la Cuarta Colonia. El ga l'obietivo general de dezvelupar laori stòreghi, culturali e lenguìsteghi con i munisipi che i fa parte de la Cuarta Colonia de Imigrasion Italiana, con la finalità de spiegar e aiutar la popolasion, le asosiasion culturali e i munisipi par la valorizasion de la Lengua Talian (Veneto Brazilian) come un modo de preservar la storia, la cultura e la conosensa de i imigranti.

In funsion de la granda magioransa de i imigranti èser veneti, la lengua che cuà se ga originà la ze na variansa de la Lengua Veneta de'l nord de l'Italia, con cualche influensa de la Lengua Portogheza locale. La ze conosuda anca come Dialeto Veneto, Veneto Brazilian e pì de resente come Talian, cusì stabilìi da scritori e da cueli che i fa programi de radio in 'sta lengua par far reprezentar la lengua de imigrasion parlada nte'l Brazil par tuti i pòpoli de'l nord de l'Italia.

A ze inportante dir che la Lengua Talian la ze difarente de la Lengua Italiana. La unifegasion italiana (1861), ga meso insieme, inte la Italia de ancói, difarenti renji con difarente lengue, che i ga finìo inte'l 1866, con la anesasion del Veneto. Inte'l 1861 el primo Re d’Italia, Vittorio Emanuelle II, el ga ciapà la Lengua Toscana (Lengua Italiana ancói) par èsar la lengua ofisial de la Italia. Cusì, anca se la Lengua Veneta la ze pi antiga che la Lengua Italiana, par volontà de'l Re, la se ze deventà una lengua minoritaria rento la Italia, parlada ancói da el 70% de la popolasion de la region de'l Veneto. Par el fato che manco de 1% de i imigranti el savéa parlar la Lengua Italiana (Toscana), la Lengua Italiana la zera una lengua straniera par l'imigrante de'l nord de l'Italia e i só desendenti, tanto che inte'l Brazile se studia la Lengua Italiana in serte scole come una Lengua Straniera Moderna. Par n'antro lato, el Talian el ze stà reconosùo da el Governo de la Federasion Braziliana inte'l 2014 come Referimento Culturale Brazilian, che el lo fa deventar na lengua nasional. Ma, bizonjemo tuti saver che tanto l'Italiano cuanto el Talian i ze lengue molti inportanti. Una non la ze mejo njanca pedo de l’altra, parche le ga caraterìstighe e apligasion diverse.

Ancói, la Lengua Veneta e só varianse, la ze parlada inte'l nord de l'Italia (Lengua Veneta), inte la Croasia e Slovenia (Istroveneto), in Chipilo/Mexico (Veneto Chipileño) e inte la region sud de'l Brazile e inte'l stato de Espirito Santo (Talian o Veneto Brazilian).

Autore: Marcos Daniel Zancan

talian@ctism.ufsm.br