Cari amighi radioascoltadori de la Radio Brasil Talian ne’l Rio Grande do Sul, Brazile e ne’l mondo! In cuesto artìgolo ndemo parlar de’l grupo “Le Arti per Via” de la sità de Bassano de’l Grappa, rezion de’l Veneto – Italia, che dopo 16 ani ritorna a Santa Maria e inte la Quarta Colônia, par far beli espetàcoli artistighi e culturali. El grupo, con pì de 60 parsone, farà un ziro par el Rio Grande do Sul e starà ne la nostra rezion de 20 a 22 de lujo de 2018.

El grupo “Le Arti per Via” ze nato in Bassano de’l Grappa in 1984, dopo una longa riserca par far riprezentar, de modo orizinale, le profesion e i laori che se fazèa ne le sità venete ne’l período de la imigrasion, ne’l final de i ani 1800. Cuesto grupo romai gà fato pì de 374 spetàcoli in 15 paezi de la Europa e in 6 paezi fora de la Europa (Mésico, Canadà, Estadi Unidi, Arzentina, Brazile e Austràlia), tuti paezi che gà imigranti de la rezion nord de la Itália.

Cuesto grupo gà una proposta culturale nova e orizinale, de grande eficasia spetacolare, co la parfeta reconstrusion de la època, un vero muzeo che vive insieme co le parsone, che riprezenta la nostra storia e cultura comun tra cuei che ze restài ne’l nord d’Italia e cuiei che ze vinjesti cuà par Brazile.

El grupo “Le Arti per Via” gà come moto “Cuando la strada deventa un muzeo e el muzeo deventa un spetàcolo”. E parlando in spetàcolo, ne’l dì 21 de lujo, a le 17 ore, el grupo starà ne’l Royal Plaza Shopping, in Santa Maria, e ne’l dì 22 de lujo, ne la Quarta Colônia, in Vale Vêneto, dove a le 14 ore e 30 minuti sarà fato el sfile par vèrder el Festival Internasional de Inverno e la Stimana Italiana de Vale Vêneto. Ne’l 19 de lujo el grupo farà un incontro co’l Governador Sartori e dopo de i spetacoli ne la nostra rezion, el grupo farà prezentasion in Iraí, Marau, Encantando, Carlos Barbosa, Bento Gonçalves e Nova Bassano.

Insieme co le prezentasion, sarà fato la divulgasion de’l libro “Ti tazi senpre, Te parle mai”, organizato da Catia Dalmolin, bilingue, in Talian (Vêneto Brazilian) e anca in Italiano, dove el Veneto Brazilian starà scrito co la grafia veneta ofisial de la rezion de’l veneto, rispetando, sicuramente, le parole che fà parte de la nostra variante linguistega cuà. Rento al libro, tra tanti beli artìgoli, se trova la Relasion Tecnigo Lenguìstega sul Talian, el primo artìgolo sientìfego che gà fato el confronto tra la Lengua Veneta e la Lengua Talian (Veneto Brazilian), un inportantìsimo artìgolo sientífego par la nostra variante veneta cuà.

I eventi gà la organizasion zeneral de’l Comitato Veneto de’l Stato de’l Rio Grande do Sul e anca de’l Sircolo Veneto de la Asosiasion Italiana de Santa Maria, e el Progeto Talian, co tanto orgoljo, insieme co la Coordenasion de Tecnolozie de Insenjamento de’l CTISM, ze ndrio laorar ne la diagramasion e stanpa de’l libro.

Se te vol conoser pì el grupo “Le Arti per Via” e le sue prezentasion, va ne la internet inte’l indirizo www.leartiperviabassano.com, o anca ne’l Youtube, dove se trova tanti spetàcoli romai fati. Invitamo a tuti par star insieme inte le presentazion cuà ne la nostra rezion. Sarà una oportunità incredìbile.

Marcos Daniel Zancan

Universidade Federal de Santa Maria - RS