El baìto, sianca lera un cagneto picolino lera anca boníssimo. El gavea el pel de color bianco co na riga zalda in torno el còl e par sora del filòn. Lera sempre vigilante con quel che sucedea intorno de ndoe lu stea. El restea co le recie slevade a scoltar qualche rumor strànio; coi òcii vèrti para veder qualche falcheto che stessa a volar e col naso verto par sentir qualche udor diferente che se fessa sentir. Par dir la verità, sianca picolin lera pi furbo e svelto che tanti altri cagni pi grandi. El tegnea de conto la casa, la cantina, la stala, el punaro, el orto e par sora tuto el volea ben al so paron perche tuti i di el ciapea par magnar na bela feta de polenta e qualche òss par rosegar.

Quando ndevem laorar in colònia, tei primi tempi l’ndea insième anca lu, ma col passar dei ani el ga scominsià a no ndar tute le olte. El ga scominsià a diventar pegro, a dormire depi del normal, a no badar ai sorzi e no scainar come na olta. Lera i ani che se fea sentir anca a lu. L’ndea in giro meso imbambio, come per passarse el tempo. Ntee giornade calde el se postea soto la ombra de na pianta, ntel inverno o co piovea el se trea in cantina sora un vècio coro de pegora. Ma sianca tuto questo sucedea, col vedea che se rivea darente co la feta de polenta, de contento ncora el remenea la coa.

Luiz A. Radaelli – Lajeado - RS