Cari amighi radioascoltadori de la Radio Brasil Talian ne’l Rio Grande do Sul, Brazile e ne’l mondo! In cuesto artìgolo ndemo parlar de’l Monte Grappa de la rezion de’l Veneto - Itália, un de i monti pì beli de la Europa e che i imigranti veneti ga porta ne’l cuor par altri posti de’l mondo, come in Ivorá, dove se trova un Monte Grappa e anca nel Mèsico, ne la sità de Chipilo, dove anca se trova nantro Monte Grappa.

El Monte Grappa veneto se trova ne’l prealpi veneti, tra la pianura veneta a sud e i teritori sentro-alpini a nord, e ga 1775 m de altitude. El teritorio de’l Monte Grappa ze divisa tra tre provinsie venete, Vicenza a oest, Treviso al sud e Belluno al nordest. A i pie de’l Monte Grappa se trova la sità de Bassano de’l Grappa. Ne la prima guera mondiale e anca ne la seconda guera mondiale, el Monte Grappa ze stà un posto de tante batalje con tanti militari morti, in espesiale ne la prima guera mondiale. Fin ancò se trova ne’l Monte Grappa le buze de le bonbe. In onor a tuti i soldadi morti, tanti italiani cuanto austroungari, i ga fato ne’l Monte Grappa um sacrario, co i resti mortali de i militari, e anca un museo de la guera.

El sacrario ze stà inaugurà in 22 di setenbre de 1935. Ne’l corpo sentrale de’l monumento se trova i resti mortali de 12.615 militari, dove de 10.332 mai se gà savesto el nome. El monumento ze stà fato con sincue sircoli consentrigui pozisionadi un su el altro de modo a formare una piramide. Su la piramide se trova la Madonina de’l Grappa.

Ancò el Monte Grappa ze un posto turistego, dove se pol ndar a pie, a bicicleta, e anca a caro. Ne’l Monte Grappa se pol far volo libero e anca escalade. Ma se pol far tuto cuesto solo ne’l istà parche ne’l inverno el Monte Grappa resta coverto de neve, e tanti va su par schiare ne la neve.

Tante musiche ze stà fate par racontar la triste storia de le guere ne’l Monte Grappa, come cuesta, fata in Veneto Brazilian:

Óh monte Grappa!

Òh Monte Grappa, come sei belo,
Tu sei el maselo de la gioventù.
Òh Monte Grappa, come sei alto,
Sei stà el desfalco de la gioventù.

Òh Monte Grappa, come sei grande,
Co tanto sangue de la gioventù.
Òh Monte Grappa, come sei nero,
Gran cimitèro de la gioventù.

Òh Monte Grappa, come sei baso,
Sei sta el fracaso de la gioventù.
Òh Monte Grappa, cuanti dolore,
Gran traditore de la gioventù.

Òh Monte Grappa, verde e bianco,
Gran canpo santo de la gioventù.
Òh Monte Grappa, come sei bruto,
Sei sta distrutore del la gioventù.

Òh monte Grappa, rupi ferozi,
Co tante Croze de la gioventù. (2x)

Marcos Daniel Zancan

talian@ctism.ufsm.br