Cari amighi radioascoltadori de la Radio Brasil Talian inte’l Rio Grande do Sul, Brazile e inte’l mondo! In cuesto artìgolo ndemo parlar de la storia antiga de la nostra Lengua Talian, el nostro Veneto Brazilian, che fa parte de la fameja Veneta de Lengue. La orizine ze la Lengua Veneta, la lengua ofisial de la Serenìsima Repùblega de Venezia e che dopo, co la imigrasion, ze stà portada a tuto el mondo, creando diverse varianse (Veneto Brazilian/Talian, Veneto Chipileno e Istroveneto).

Secondo la “Declarasion 10 Aprile”, che ze stà una asion de Reconosimento Istitusionale de la Lengua Veneta, ne’l nord d’Italia, el primo documento che l’atesta el pasajo da’l vecio latin a la nova lengua volgar scrivesta in Europa l’è l’Intivarelo Veroneze (fin de’l sècolo VIII e inisio de’l sècolo IX, drio serti studiozi torno l’ano 790), anterior de mezo sècolo respeto a’l Zuramento de Strasburgo (de l’ano 842), che el ze stà la prima atestasion scrita de’l volgar proto-franseze e de’l volgar alto-todesco antigo. L’Intivarelo Veroneze el mostra dezá serte caracterìstighe de la Lengua Veneta, in partegolar de la variante veroneze, che le eziste e le ze rescontràbile anca adeso.

El uso vero e próprio in canpo letaràreo, polìtego e zurìdego de la Lengua Veneta scrivesta (par i testi che A ne ze rivà) el va postà, parò, intrà la fin de’l sècolo XII e l’inisio de’l sècolo XIII, co’l Ritmo Belumat (datà 1183-1196) e co arcuante documentasion, spesialmente inte la variante veneta venesiana, da i proverbi in volgar lustro de’l sécolo XII a i pichi dozentani de i Fasti de Piero Zustiniani (1202), a i Tratadi intrà Venesia e el Sultan de Alepo (1207 e 1225) e a’l Tratado intrà Venesia e el Re de’l Ongarìa (1244) ; a la fin de i ani 1200, A se data l’òpara lustra asè El Milion de Marco Polo, che la vanta anca la varsion veneta, darente a l’orizinale detà da Marco Polo lu steso a Rustichello de Pisa.

Senpre inte ‘sta faze A se posta po’ la ventura fasinante de la letaradura veneto-provensale che la ciapa da l’espariensa de i poeti trobadòreghi in Lenguadoca e de la consistensa e concretesa de la Lengua Veneta doparà normalmente rento de cuela che la ze la Venetia stòrega. Intrà le òpare de ‘sta fioriduta A se pol recordar: l’Entrée d’Espagne de um anònemo padoan (1320), l’Orlandin franco-veneto de um anònemo (1340) o incora l’Aquilon de Baviere de de Rafaele da Verona (fin 1400). Da resto, el steso Dante el recorda pulito inte’l só De vulgari eloquentia (1305) próprio el Veneto cofà lengua prezente e delineàbile pulito, tanto inte la variante da tera (Trevisan) che inte la variante da mar (Venesian). E njanca, da resto, A se pol scóndar el gran nùmaro de inprestii de ciara pega veneta che A se ghin cata trasa rento la Divina Comedia (Dante, da resto, el ga razentà asè le strase so l’Àdeze inte’l só vìvar cotidian durando i só vari sojorni a Verona.

La Lengua Veneta, donca, la ze na inportante lengua stòrega de l’Europa, e par vero de le piasè antighe.

Marcos Daniel Zancan

talian@ctism.ufsm.br