Cari amighi radioascoltadori de ła Radio Brasil Talian inte’l Rio Grande do Sul, Braziłe e inte’l mondo! In cuesto artìgoło parlaremo de una parsona che ła ze stà una refarensa inte ła Quarta Colônia par ła nostra storia, łengua e cultura, el Prete Clementino Marcuzzo, da Vale Vêneto.

Clementino Marcuzzo, fiol de Luiz Marcuzzo e Amàbile Bortoluzzi Marcuzzo, el ze nato a 12 de setenbre de 1927 in Vale Veneto, che in cuela època fazèa parte de’l munisìpio de Cachoeira do Sul-RS e el ze morto a 15 de zunjo de 2009, in Santa Maria-RS.

Clementino Marcuzzo el ze stà prete, scritor e resercador. El ze laureà in Filosofìa, Teolozìa e Zornałismo. Fazèa parte de ła Congregasion de i Preti Palotini, e se ga deventà prete inte’l dì 21 di dezenbre de 1958, par Dom Luís Vitor Sartori, inte’l Santuàrio de ła Medianeira, in Santa Maria-RS. El ga pregà ła prima mesa in ła Ciesa de Corpus Christi, in Vale Vêneto, inte’l steso posto dove i ga rivà i primi Prete Palotini inte’l Braziłe e anca inte ła Amèrica Łatina.

Clementino Marcuzzo zera menbro, da 1988, de’l “Instituto Histórico e Geográfico de Santa Maria” e in 1991 ga scominsià far parte de ła “Academia de Letras Municipais do Brasil” doparando ła carega nùmaro 115. In 1984 ga creà ła Asosiasion Culturałe de i Studenti de Vale Vêneto e in 1985 ga fato parte de ła creasion de ła Societá di Cultura Itałiana de Santa Maria. Anca in 1985 se ga torna sosio de’l “Colégio Brasileiro de Genealogia” de’l Rio de Janeiro. In 1988 el ga creà ła AVE - Asosiasion Veneta, co’l objetivo de mantenjer ła cultura veneta inte ła nostra rezion.

In 1986, el Prete Clementino Marcuzzo el ga creà la Setimana Culturałe Itałiana de Vale Vêneto, che se fa tuti i ani, insieme co’l Festival Internasional de Inverno. In łujo de cuesto ano ła ze stà fata ła XXXIII edision de ła Setimana Culturałe Italiana, che fra tante robe bełe, ła ga portà a Vale Vêneto ła prezentasion de’l Museo “Le Arti per Via”, de Bassano del Grappa, Itałia.

Incora, in 1975, Eduardo Marcuzzo, fradel de’l Prete Clementino Marcuzzo, ga creà el Museo de’l Imigrante de Vale Vêneto. El Prete Marcuzzo el ga dato suporto e ga incoraja el só fradel Eduardo a portar avanti el museo, che incò ga el nome “Museu do Imigrante Italiano Eduardo Marcuzzo.”

Come scritor e resercador, el Prete Clementino Marcuzzo el ga scrito tanti łibri, come par ezenpio “Proverbi Taliani Veneti”, che me ga regalà cuesta setimana el amigo Luiz Moacir Marcuzzo, de Vale Vêneto. Ringraso anca al amigo Luiz José Pivetta, che me ga aiutà co’l stòrego de ła vita de’l Prete Clementino Marcuzzo.

Cusì, in cuesto artìgolo, el Projeto Talian fa cuesto onor a’l Prete Clementino Marcuzzo, par tuto che’l ga fato par ła nostra storia, łengua e cultura, e che tuti noantri, adeso, gavemo ła responsabilità de łaorar e portar vanti, par tute łe nove zenerasion.

Marcos Daniel Zancan

talian@ctism.ufsm.br