Na olta quando el Nani l’è ndà a spasso ntea casa dea zia Catina el ga  vardà che le galine, i gai e i polastrèi i ndea co le ale alsade come se i fussa drio patir de caldo, ma no ghe zera nissuna ragione par quel suceder. Tante le ndea russarse ntei busi ntea tera come se le volessa gratarse. Altre le se becolea ndoe le podea e rivea.

 Par passarse el tempo dopo el disnar el nono el ze vegnesto bever simarron e anca schersar. Co’l ga vardà che ste pore bestie le zera drio patir el domanda a la zia Catina se le galine le se gavea fermà de meter ovi. Co la conferma el va e el ciapa in man un picol polastrel e scominsia a vardar in meso le piume e el vede picole bestiolete – i pulini – a correr soto le piume darente la pel del polastrel. El ga dit che bisognea passar el “Pó de gafanhoto” par copar sti pulini.

Tel di drio vanti de verder el punaro tute le ga ciapá la so parte de pòlvere. Con quela, per un bel pessot de tempo no se ga mia sentisto pi dir che ghe zera puldi a spissigar le galine. Fin i sghiti i ze stati menai via del punaro e i ga passà la calssina par copar i bisseti e i ovi che i zera sora le stanghe. De contentessa fin el gal vècio el ga tornà a cantar co lera drio spuntar el di.

Luiz Agostinho Radaelli