Ricordo che sti ani ntel spuntar del di, èrino ncora butadi ntel leto  quando scolto la mama che ciama.  Co me desmìssio vedo che la ze darente e che la ga un  cuciaro nte na man e un bolòc de sucro nte quelaltra. Capisco che quel l’era el di de darghe l’òio de rìssino ai fioleti. La zera darente a me e in fondo al  leto, el  pòro pupà. La slonga el brasso e sensa che gavessa oportunità de dir qualcossa, riva ntea me boca na cuciarada de òio. Lo go  bevesto, go parà zo el sucro  e  dopo me parea de trar su fin le budele.  Go rutà sto maledeto òio tut  el  di.  Na oreta dopo go capio parche che i me lo dea  par beverlo a  la  matina e  nò a  la  sera.

Sucede che a quel tempo no ghe zera la latrina e lera un rento e fora dee scapoere o dela piantion de milio fin  el  mesdì. Vegnia de quele slavinade che no’l dea mia par tegner e gnanca par dassar par dopo. Bisognea correr par no passar la vergogna de farsele ntee braghe. Dele olte tochea ndar fora svelti par gomitar su tut e quando sucedea i ne fea bever nantra olta. Ciare olte se guadagnea na scudela de cafè nero par bever e i ruti che vegnea i spussea pedo che scorese de ceole e ravanèi. Ma el òio el fea qualcossa de bon ntele budele par che’l parea fora le bùtele che se gavea. Ah! Come dopo se bevea volentiera na scudela de cià de bonmaistro. Penso che le par quela che fin ncoi me fa fastidio sentir parlar del òio de rìssino.

Colaboratore: Luiz A. Radaelli – Lajeado  - RS