El tempo ntel su amplo sentido lé na cosa che no se pol mesurar, perche el ze la eternitá. Nol ga scominsio e ne fine. El sará per sempre. Co la idea de imbroiarlo i omeni i ga creá na magniera de spartir el so tempo. I lo ga spartio in ore, di, stimane, mesi, ani, sècoli e milênii, ma questo no significa nula perche lu el ze infinito. Finito lé el tempo de tuto quel che vive o esiste su la terra, sia bèstie, gente, piante, pessi e anca i sassi. Col passar del tempo tuto se finisse, se rovina, se smarsisse davanti la forsa del tempo cósmico. Ntea stòria dela umanitá gnente sovrive al tempo. Paesi e governi per pi poderosi che i sia i se finisse, per i omeni e done, per pi studio e potere che i ga nissun scampa del tempo. Anca le pirâmide, monumento del Egito fat coi grandi sassi no i ga como oporse al tempo. Pian pian i se rovina fin diventar grani de sábia o de pòlvere.

Co sto a pensar sora el tempo vedo che la so mesura dipende de na infinitá de cose, o sia, per chi ga fame o per quei maladi, qualche qualche oreta sembrará longo tempo. Per quei che i ze vèci o sta per morire el tempo vola altro che svelto, chi sa i potessa fermarlo. Ma el tempo no se ferma mia. Lé come el vècio orológio picá su in tea parete dea casa dei noni. No lo go mai visto o setisto dir chel pontiero el ga torná in drio. Sianca el batòcio el sonea no ghenera come farlo girar in drio cul.

Luiz A. Radaelli – Lajeado - RS