Le galine e tute le altre bèstie che vola le ga el durel. Dei pi grandi al pi picolin tuti i lo dopera par triturar quel che le magna. Se pol dir chel ze na màchina per distrugere el magnar e fin le somense pi dure el ze bon de strassinar e trasformare in energia per farle vìvere.

Co se copea gai, galine, oche e faraone se doperea el durel par far el brodo e anca la minestra de agnolini. Me piasea magnarlo perche altro che dassar el gusto ntel brodo nol ne fea fadiga morsegarlo. Mescolá co le sate, el còl, le ale e el formai gratá feven de quele bele magnade che ne dea le forse che se bisognea par laorar in tee longhe giornade in colònia. Pi de na olta vegnia fora qualche barufa perche i altri i lo volea magnarlo e no lè stá sol chen dí che la mama lo spartia i due tòchi par contentar a quei che lo volea. Ncoi se lo compra in tea quantitá che se vol ntel mercá. Per questo e per tante altre còse no vui mia tornar in drio nel tempo. Sianca bisogna i soldi par compralo, la vita la ze mèio de quela de quel tempo. Gavemo fin el frigorifico par urtar rento quel che magnemo, na còsa che mai se imaginea gaverlo. Varda de far polito e mangnar soltanto quel che bisogna par no vegner el mal de pansa e ndar tuto zo par le braghe.

Luiz A. Radaelli