Qualchuno che ga vivesto ntea colònia el sa che sti ani indrio no ghenera la comodità dei di de ncoi. Tuti i gavea una o anca due giunte de bò par tirar la careta, la slita o l’vassor. Co lera tempo de arar la tera par semenar, i bò co i tirea el vassor anca i magnea la erba che i catea. Ma co el mìlio rivea ntea altessa dei trenta sentimetri bisognea postar la tera darente ai pie par che’l gavessa come tegnerse in pie e no cascar co’l vento. Par far sto mistier se doperea el varssor, tirà per la giunta de bò. Par che noi magnessa el milio el pupà el ga fat le “musarole”, na spèssie de bussal che lera metesto ntel muso dei bò e nol permetea che i magnessa la erba e enmeno le piantele  de mìlio.

Fa tanti ani che no vedo mia pi qualchuno doperar le musarole. Tanti gnanca pi bò i ga. Ncoi chi laora la tera ga la màchina che se ciama trator, che pi svelto e sensa fadiga el fa el laoro restar pronto in manco tempo. Nemeno la sapa no se ghen vede mia pi. I dopera i veleni che sianca i dassa le piante vegner bele e sane, copa i bisseti e chi sa anca noantri. Gnanca i ortagi i scampa dei veleni, gnanca le ingùrie e le naranse. Tante malatie le vien fora e no se sa de ndoe le vien. Tei dì de ncoi bisognaria meter le musarole a tanta gente che parla quel che no i sa, prinsipalmente i politichi, perche la magioransa verde la boca so’l dir busie.

Luiz A. Radaelli – Lajeado - RS