Che bela stòria che te ne ghè contà, Juvenal! Tuti i personàgii i ze stadi ben caraterisadi: la Grigialda, stupenda, ecessional, co’n QI de génio; Cesco, un santo omo, el ne ricorda San Francesco d’Assisi, de dove i soi genitori i ga de ’ver tolto d’impréstio el so nome; Felin, un furbante, come arquanti su par i nostri monti; e tuti i altri: la Indira, el Prete, el Prefeto, i fioi de Cesco e tuto el bestime dela stòria! Te sì bravo, caro Juvenal, te sè inventar e contar stòrie pròpio ben!

Mi, che cognosso la stòria ancora del princìpio, parché ghe go giutà a Juvenal a curarla, me go incantà co i personàgii, màssima co la Grigialda e con Cesco. Cesco l’è un santo omo, come go bel dito, un de quei se ghen cata uno in mila. Vedaré, a misura che lesé sta stòria. E la Grigialda, lora, la ze, come se dise in brasilian, fora de série!
Quando mi feva scola, tantìssimi ani indrio, ghe diseva ai mei aluni che le persone se pol divìderle in trè grupi: 1% i ze ecessonai positivi, o sia, gente che ga un altìssimo QI; 89% i ze gente normal, o sia, come noantri; e i altri 10% i ze gnochi del tuto, o sia, imbambidi, par non dir pègio. E ghe diseva ancora: l’umanità la va avanti, la se svilupa, par via de quei pochi che i fa el 1% de tuto el pòvolo!

Se anca col bestiame val sta proporsion, vedarè, valtri che sìi drio scominsiar a leser sta stòria, che la Grigialda, seben che la sia na galina, la fa parte de sto 1% de tuto el bestiame del mondo! Fora esser inteligente e saver farse intender, tanto co le bèstie domèstiche come co le bèstie selvàdeghe, la ga imparà anca a parlar co la gente e, fora sto don de farse capir, la ga na caraterìstica incomun: un grande poder de lideransa! Che spìrito! Che furba, sensa esser furbante! Fin a i militari ‘golpisti’ la ze stada bona de tor in giro! E, sora de tuto, la ga na filosofia polìtica che pochi òmini i riesse a ’verla!

Lesé, lesé pure, no ve conto pi gnente, sinò ve fasso perder l’incanto dela letura.

La Pinta (Pinto Bandeira), autuno del 2013,

Darcy Loss Luzzatto