Oncó co ghe semo drio parlar
Fursi arquanti se impressiona
I dise de no esser bon da credar,
Dele robe che faseva me nona
Da on tempo che mai va tornar
Che no menava gnessun a condana.

Tel tempo de gran rusticità
La me nona tanto laorava
Piaseva dei laori ntel pra
Assieme del nono tea campagna
Tante sorte de piante la semenava
Costumansa dea zente italiana.

Col bigol la aqua la trasportava
A la lontana in una vècia fontana
Mondeva le vache ben bonora
La gera pròprio na brava dona
Formaio e butiro la pareciava
La ndeva in serca dela bobana.


No ndeva in risserca de ciavaria
Come ga incoi co la modernità,
Donca la ndeva in serca de legria
E par la so mùcia de fioi slevar
Te on tempo che se viveva in compagnia
Sensa pressa che el moderno ga fato cambiar.


La me pora nona pregava la corona
In latin e anca in italian,
La gera na Santa dona
De gran stirpe del popol trevisan,
La fameia dele olte la ghe mensona
I consìlii dea nona che la ze ndata lontan.