« Voltar
NEGÒSSIO DELA CINA
Del libro: Grigialda Galina Contadina -Capìtolo 2
Comersindo Felin l’era de star a Dois Lajeados, e el fea giustìssia al cognome de Felin, parché l’era brao de far negòssii. Sempre che el podea ciavar i coloni, el lo fea sensa scrùpoli. Ogni tanto el li ciavea ntel peso del prodoto, altre volte ntel truco, o el ghe catea fora mila difeti par sbassar el prèssio dei prodoti. El prèssio dele so mercansie che el vendea, però, mai el se sbassea, pitosto, sempre un poco pi care a ogni volta che el vegnea. Par questo tanti, par de drio, i lo ciamea de Gatoran, parché l’era pròpio un felino. Quando el vendeva a fiado, se un se ciapea mal, el ghe cobrea giuri che ghe sbrusea le scarsele. Tuti i mesi el fea el giro col camignoneto 1946 pien de batarie, bestiolete, robe de magnar dela colònia, vin, formaio, salami che’l todeva su in càmbio de conaio, sal, sùchero bianco, erba de simaron, salmognaco, pévero, velen de formighe e rati, creolin, spìrito, petròlio, remèdii pai berni e carapati, sape, ronconi, ronciele, brìtole e tante altre robe. L’era squasi un mercà ambolante. Cesco el gaveva un dèbito con Felin. L’era pena stà condanà par el giùdice a pagar una indenisassion par colpa de na galina che da ani in drio el ghe gaveva dato in préstio e la ghe gaveva causà un grandìssimo pregiudìssio ntela Mostra Internassional del Bestiame. Felin sempre el ghe mensoneva sempre el dèbito e Cesco el pagheva un poco al mese coi schei che el vanseva dela véndita dei prodoti dela colònia. El ghe ga vegnesto in mente alora, de mensonarghe un’altra galina brava, sensa magari dirghe che la zera pròpio fiola de quela galina che la ghe gaveva fato perder soldi e passar vergogna davanti milioni de persone ntela Mostra. Co Cesco el ga mensonà la galina Grigialda, quela brava de far ovi, el comersiante el se ga interessà suito in cognosser la bestioleta. La Grigialda la zera lì, pochi metri distante, ntel cortivo dela casa. Co’l se ga incorto che la zera pròpio na bela galina, ben fata de corpo e anca de bei colori, suito vista, el ga volesto comprarla e el ga ris-cià na oferta, calculando a òcio, el peso sporco in torno dei tre chili e meso. — Mi te dao diese conti! — ga dito el Signor Felin. (L’era poco pi del valor del peso sporco dela galina viva). — No stà gnanca ofénderme! — ghe risponde Cesco, coi òcii raversi, vardàndolo come se’l lo sbusesse fora e fora co na ociada fulminante. — No stà mia parlarme de préssio de carne, parché le me bèstie no le slevo su par coparle, in modo spessial questa galina, che solche de ovi, nte un mese la se paga e vansa soldi, sensa menar in conto i bei polastrei che la me sleva su! E te digo nantra, la galina no la ze in véndita. Te la dao in afito par un ano e vui al manco cinquanta conti! Felin, alora, co na ridestina par depressiarla, l’è ndà su col prèssio due o tre fiorini, ma cola idea de tirar in zo el prèssio de Cesco, che a lu el ghe parea un spropòsito. Ma, Cesco l’è stà duro ntela dimanda, sensa ricular gnanca un teston. El ga proà de tute le maniere ma, romai, a Felin l’era drio végnerghe su i nervi in testa e anca el sàngue el ghe boieva ntele vene. Dopo de diverse proposte e vedendo che anca Cesco l’era drio inrabiarse, Felin el proa far nantra oferta che’l credea no’l gavesse maniera de refudar, pensando che no’l perdaria el negòssio par colpa de un conto. — Quaranta nove e la Galina la ze mia! — el ga osà forte Comersindo. — Sinquantassìnque e qua de un minuto sinquantassei! — l’osa ancora pi forte Cesco, con ràbia, vardàndoghe ben rento ntei òcii de Felin che’l se ga fin spaurà, fastràndosse un metro in drio schena. Tanto contrarià magari, ma par no perder sta galina che ciapea pi un conto de valor a ogni minuto che passea, el tira fora i sinquantassìnque conti, un sora l’altro sula tola come se’l fusse drio contar un baraio de brìscola. Con quei soldi lì, Cesco el paguea el dèbito con Felin e el saria lìbero de esser sempre pestonà cola cobransa. Cesco el conta i soldi vardàndoghe nota par nota contra el sol par veder se ghen zera qualcheduna de falsa. Suito, el ciapa sta galina, poareta, a chi no ga gnanca ocoresto córerghe drio, parché la zera tanto mansa che basteva ciamarla e ela la vegnea su par i pie come un cagneto. El ghe la ga data in man al Signor Felin e el ghe zonta na avertensa mescolada con maledission: — Te ricomando de tratarla de maniera spessial e de darghe de magnar sempre del bon e del meio, no assarghe mancar l’aqua neta e, se rivo saverlo de qualche maltrato, te fao ciamar ntel delegado e te meto mi su un processo. Me la porto in drio sensa dirito de indenisassion! Se un di te vien voia de tirarghe el col, sta securo che el diaol el vegnarà cusinarte ntel fogo del inferno! Stà mia desmentegarte che son drio dassàrtela in afito par un ano sol! Cesco, che de bauco romai el gaveva pi poco, el gá ciapà na foia de caderno e lo ga fato far la firma soto un per de righe de compromesso de darghe in drio la galina con salute. Felin no’l se ga mia spaurà nè cola firma e nè cola maledission del inferno, parché no’l ghe credea gnanca al Signor Dio e, manco ancora che esistisse el diàolo. Lu’l ghe credea sol ntei soldi. El disea: “Coi soldi compro anca l’amor de le done.” Par lu l’era vera, parché l’era pi grossolan che bruto, che gnanca na dona la volea smorosarlo. L’è restà scapolon in tuta la vita. Felin el ga metesto svelto la galina Grigialda in sima del camignon, rento nte na gàbia co na stramesa, insieme ale altre galine, gai, anaroti e pioti inmuciadi un su par l’altro che i se pestolea. Ghenera fin de quei che i gaveva le sate ligade con spago e che mal, mal i podea móverse, tuti mesi strussiadi su. — Pore bèstie, ste galine! — la ga pensà. — Gavarale fato qualche malan par meritarse la preson? La stramesa l’era par qualche galina difarente, un posto spessial de un palmo par due, ndove no se podea gnanca móverse né avanti, né indrio. Spaventada in quela maniera lì, la galina Grigialda la ga proà far forsa ntel stecato dela gàbia par scampar ma, la ga mal e mal riussisto a meter la testa e el col fora par le sfese par poder starghe rento un poco meno ingrumada. Grigialda, vardando le altre bestiolete inmuciade in quela maniera, pestàndose una sora l’altra, che le ghe fea fin pecà, no l’è stada bona de capir cossa che l’era drio suceder. El comersiante el ga girà la manivela del camignon fin far ciapar el motor che’l fea un baruio che mai, che’l parea una guera con s-ciochi de rochetoni e moschetoni e fea anca na fumassera de sconder via el sol al mesodì. I pitossei, spauradi, i spiolea in serca de so mare, dispersi ntel cortivo a corer in qua e in là come mati spaventai, sensa saver ndove scónderse, costumai che i zera a ndar soto dele ale de so mare par scónderse dela paura o scaldarse del fredo. Ghe zera anca un polastrel, el pi grandoto de tuti, bel rosso, con pene negre, bionde, gialde e bianche mescolade, che le parea pintade par un artista, parché el someiava pi un osel tropical che propiamente un polastro. Quando el ga visto la mama serada ntela gàbia, el se ga trato adosso par verzer la portela, tirando via el passel col beco ma, el comersiante Felin, vedendo che Cesco no zera drio farghe la varda, el lo ga ciapà con ràbia par na sata e, seràndoghe el beco par che nol scheolesse, el ghe ga dito: — Sto colpo te ciapo par na gamba ma, nantra volta te ciaparò pal col! — parlàndoghe soto ose Felin par no farse sentir de Cesco, che sicuramente el ghe disaria su nantra bela prèdica e el ghe faria nantra maledission. Lo ga trato via distante e, par sorte che el savea zolar un pochetin, el se ga schivà de farse su del mal contra un palanco del vignal. Col camignoneto in movimento, sgorlando come na careta vècia ntei busi e sassi dela strada, el Signor Felin, guidando, l’è ritornà a casa sua pien de mantimento, bestiolete e un bel paco de soldi, che i li scondea soto el assento, par paura che el fusse ciapà de qualche assaltante. Dele volte el ciapea strade fora dela Giral par scamparghe ai fiscai, parché lu no’l tirea nota de gnente e no’l paghea gnessun imposto. Par lu, imposti zera cosa de poareti e, poareti i zera, parché i paghea imposti. Grigialda la sente che, suito passadi via de un pìcolo paeseto, se stusa el motor e la vede che i zera rivai a un cortivo novo, casa nova, stale de porchi e vache, caponere e paioi novi. La Grigialda la ga pensà: “Adesso el me molarà fora de questa gàbia e sarò lìbera nantra volta!” L’era un bel posto, ben tendesto anca questo, ma la ga stranià che no la vedea gnanca na bestioleta fora ntel cortivo. Fursi, le galine le saria in volta pal mato ma, no se vedea nemeno na pena o un schiton in volta che fusse come segnal che lì ghe saria galine molade fora. |