Me mama se ciama Ortenila e la ze dela fameia GIOVANAZ. El nucleo  GIOVANAZ ze trentino, dea region che si ciama Fai de la Paganela e i antenati de me mama ze oriundi del picolo paese che si ciama Mezzolombardo, distante pi o meno 9 chilometri dea sitá de Trento. Mezzolombardo ze situato dentro dela valada del fiume Adige, e Fai dela Paganela ze situata sora i monti a una’ltitudine de 1.030 metri su el livelo del mare, su le pendici del Monte Fausior. Ncoi ze una region molto diferente de quela dela fine del 1800 quando la fameia de GIACOMO GIOVANAZ e LUIGIA MATUELLA i ga ciapà i pochi strassi che i gavea e i se ga metesto par strada insieme dei so fioi GIUSEPPE, CARLO e MARIA, col destino “la Mérica”  par la chi sa trovar la cucagna che no i zera boni de guadagnarsela in tea so madre pátria.
Rivai al Brasile li per el ano 1883 i se ga postà ntea Linha Figueira de Melo, ala Nord, ntee so do colònie de tera co la dimension de 48.400 m². Ai 9 genaio 1884 i ricevea el titolo provisorio del so lote de tera, de numero 38, ( L. 312, p. 123, n.807; Sb, p.115). Quà in Brasile i ga bio nantri 4 fioi: ÀNGELA, ROSA, CARLOTA e MAXIMINO. 
Secondo le informassion de me mama e del zio Olimpio, el tempo che i ze stai a Figueira de Melo no se sa con presision, ma el GIUSEPPE, che’l se gavea maridà co la ANNA FRAPORTI,  el ze resta vedovo co la morte dela so consorte. Come so mama Luigia barufea tanto co una dele so fiolete, el Giusepe el se ga disgustà e el ze ndato co i so fioi picinini star in tee tere che’l ga comprà dela Compagnia de Terre in tel paese de Gramado, ncoi municipio de Relvado, e come el bosco no ga brusà polito, nol ga podesto pagar la tera comprada, e come nol gavea nddove trarse, i so amighi, vegnesti anca lori dea Linha Figueira de Melo, ma che i zera vegnesti a le tere nove, i ghe ga imprestà i soldi par comprarse un lote de terra ntel paese darente de li e ciamà  Nova Bréscia. Ghera un lote de tera che nissuni volea comprare parche la gavea un bruto perau in tea parte frontiera, ma come nol gavea ndove trarse el ga acetà. Zera tuto bosco e ghe ga tocà trar do el bosco co’l aiuto dela manara e del segon. La larghessa e la longhessa de cuesto lote de tera no son sta bon de catar in tei registri. Lo so che la scominsiea in tea strada geral che ndea a la Linha das Pedras Altas, in tea banda drita, pi o meno a 500 metri distante dea Chiesa. La larghessa zera de circa cento metri davanti, co la longhessa che ndea fin el fondo del travessom che fea la division co la Linha Tigrinho Alto. Prima de tuto i se ga fato una baraca con rami e tacoare e coerta con i rami de piante, fin che i ga spacà i legni par farse la casa. Co le scandole i ga coerto la casa. Sol arcoanti ani pi tardi i ga segà le taule de Pin par farse uma casa pi còmoda. Dopo arcoanti ani che’l stea a Nova Bréscia, l’
Giuseppe el se ga maridà co la anca vedova Giusepina Titon, e de questo matrimonio no ze vegnesto nissun fiol. Quando vecio el Giuseppe el ze restà orbo.

In tea banda darente la strada geral i ga fato un bel vignal ndove ghera vigne dela qualità Isabel, Francesa e Bordeaux, che le zera doperade par far vin par el guasto dea fameia e pi tardi la ua che vansea i vendea a la cantina mantegnesta per la Cooperativa Tiradentes.

Col passar dei ani, el nono GIUSEPPE el ze resta vedovo e orbo, ma so fioi e fiole, dopo maridadi i se ga postà meso che a torno a la tera paterna. El quarto fiol dea fameia ze sta el JOSÉ LUIZ GIOVANAZ, el nono Gigio par noantri, nassisto ai 11/03/1894 e che se ga maridà co la ORSOLA MACAGNAN, nassista ai 5/09/1896, fiola del Silvestre Macagnan e dela Ana Vigna. I se ga maridadi in tea Cesa San Pedro de Encantado, el nono José Luiz co la età de 21 ani e la nona Orsola co la età de 18 ani, nel ano 1915, dacordo col registro fato nel libro 2 A, matrimònio nº 17 dela Parrochia de Encantado. El prete che ga benedio sto matrimonio ze sta el Giorgio Caviggiolo.
Me nono materno, JOSÉ LUIZ GIOVANAZ ze morto de colpo ai 12/08/1952 com 58 ani de vita. No go bio la gràssia de cognosserlo ma de tuti quanti go sentù parlar, i disea che’l ze stá un omo de gran onore, dedicato a la fameia e a la cesa. La so parola zera sol che una  e no ocorrea assegno in tel uficio. Come so pupá GIUSEPPE el ze sta par arcoanti ani fabricier dea cesa de Nova Brescia. El nono Gigio ze morto quando el zera a taiar e ligar le vigne, pena dopo mesdì. Nel Libro de Óbitos nº 1, pagina 55, assento 9, dea cesa  São João Batista de Nova Bréscia, RS, el prete Victorio de Lorenzi ga registrà l’òbito e le sta sepolio nel simitero del paese.
 
Me nona materna ORSOLA MACAGNAN la ze morta ai 23/07/1981 dopo de arcoanti ani che la zera malada. La ga perso la memória e in tei so ultimi tempi no la se nicordea pi de nissuni e de gnente. La go cognossesta e nei me ricordi, vedo una dona forte, degna, onorata, che ga bio la fede e la virtù necessaria par portar avanti quando dela morte del nono Gigio, la fameia granda e con arcoanti fioi picinini da slevar. Per i so ati, per el so laoro, per la so bontà, la zera una dona santa e sicuramente la ze in paradiso, insieme ai santi.

Tel giorno 22.01.2006, su a Marcorama, ze sucedesto el primo incontro dei dissendenti dela copia Giacomo Giovanaz e Luigia Matuella, ndove ze stati riuniti pi de 500 dissendenti. Ze stà prega na messa ndove i ga fat una dramatizasion del arrivo dei primi Giovanaz al Brasile, dopo ze stà fat el disnar, la sposicion del albero genealógico e una confraternizassion tra tuti i partecipanti. Ze stà una bela giornata de incontro festivo.

Autore: Luiz Agostinho Radaelli ai 21/04/2003