 « Voltar
Del libro: Grigialda Galina Contadina -Capìtolo 4
CIÀCOLA D’IMBROIO
La Grigialda, serada su e convinsesta de che no la garia forsa de spacar le steche inciodae con tre ciodi in sima, tre ciodi in meso e tre ciodi soto, la se ga intregada ala tristessa, avelia cola solitùdine.Un sentimento però, ghe ga impissà la speransa de ritrovar la felissità, se anca la fusse serada su. Ghe ga batesto un sentimento de cioca e ghe ga vegnesto in mente i soi pitini. Credendo che Felin no’l garia parché contrariarla, dato che la continuaria serada a darghe ovi e pitini, par parar via el rimpianto e la saudade, la ga risolvesto dimandarghe permission al paron par ciocar na dùsia de ovi. I pitini che nassaria i ghe faria compagnia.
Felin el ghe piasea scoltar la galina parlar, no parché el concordesse con quel che ela la disea, ma parché lu l’era curioso de sentir na bestioleta parlar come na persona.
Ma suito che la galina la fenia, lu el gavea la so opinion sempre pronta.
— Nò, cara, i to pitini i ze tuti belche nassesti e grandi! — ghe dise Felin.
— Come cossì, nassesti e grandi se no li go mia ciocadi? — la lo ga dubità la Grigialda.
— Varda come go pensà tuto par ti, mi vui sparagnarte de questa tribulassion, mi go la ciocadera elètrica!
— Ciocadera elètrica? No go mai sentisto dir de sta indùstria! Cossa zelo sto mistier? — la contìnua a interogarlo Grigialda.
— Ti, varda de far ovi che del resto penso mi! No ghe manca né de magnar, né àqua fresca e i ze a l’ombra tuto el di! — el ghe zonta Felin, come se el fusse drio dirghe na roba gradévole che la Grigialda la lo ringrassiesse.
— A l’ombra tuto el di? — se ga spaurada la Grigialda. — Ma poareti, gnanca un pel de Sol par scaldarse?
— Mi li scaldo col incanamento del fogolaro! — ghe spiega el paron, che’l gavea costruio un fogolaro coi cani vècii del forno de fumo desativà.
La Grigialda la se ga fata curiosa e la se ga incoraiada a dimandarghe se lu’l la assesse véderli.
— Si, si, ancora doman te li mostro e te vedarè che bei che i ze!
La galina no la zera sicura se Felin l’era ancora drio torla in giro, parché el gavea pronunsià par la prima volta parole con sincerità e serietà stampada ntela fàcia che no parea gnanca el medésimo paron che la gavea cognossesto.
— Giureme che me li mostrarè doman! — la lo sfida la galina.
— Mi non son mia un omo de far giuramenti ale bèstie, ma par mostrar che son de parola, te giuro par tuto quel che ghe ze al mondo, a Dio, se’l ghe ze, e, se ocore, anca al diàolo, se’l esiste anca quel, che mi doman te mostro tuti i to pitossei e polastrei! — el ghe giura Felin.
Felin el savea cossa che’l gavea in mente. El sodisfaria el desidèrio dela galina e anca no’l tornaria in drio col so propòsito de mantegner la Grigialda sempre in caponara.
A Dois Lajeados ghera un brao ritratista, de nome Gentil, che el costumea ritratar tuti i matrimònii, feste, timi de bola ntei torneii dele doméneghe e ritrati par documenti. Ritratar un mùcio de galine nte un galiner no saria mia difarente. Felin el ciapa el so camignoneto e l’è ndà suito rento al paese ndove zera de star el ritratista e lo ga invità a ndar insieme con lu ntel punaro grando, che i ghe ciamea de aviàrio, pien de polastri in grassa, par ritratarli. Gentil no’l gavea mai fato un laoro compagno, ma par via de ciapar un per de fiorineti, no’l ga assà scampar el freghese. El ga tirà diversi ritrati, in tute le maniere, de quei pitossei inmuciai su che i parea fin na trupa de piégore incantonade ntei di de fredo.
— Próntemeli par doman, che li go in promessa! — ghe ricomanda Felin.
— Par doman son streto de tempo, parché go diversi casamenti de fenir e farghe la intrega! — el ghe dise el ritratista.
— Ma mi te li pago adiantadi, se ocore, parché son omo de parola con chi ghe imprometo!
Gentil se gà meso amirà cole parole de Felin che, difissilemente l’impegnea parola con qualchedun, prinsipalmente col pagamento adiantà, parché sempre che’l podea far a fiado e tirarla longa par pagar i so dèbiti, lo fea e tante olte, se un el gavea vergogna de cobrarghe, el fea finta de desmentegarse dei dèbiti. Altre volte, coi dèbiti vècii da ani, el gavea coraio de giurarghe al credor che l’era sicuro de gaver pagà e el diseva che’l gavea testimònii, che no i vegnesse cobrarghe nantra volta parché el li riceveria cola s-ciopa de due cani, carga de teste de ciodi e baletoni.
Al mesdì, l’è ndà a tor i ritrati metesti ntele soade quadre, con gàncio par picarle via al ciodo.
El ghe ga portà i ritrati a la galina par incontentarla, par che la li vardesse tuti i di picai via ntela portela dela caponara e anca fora ntele tàole davanti la caponara par che la gavesse certetessa de che i so fioi i zera ben rincuradi.
— Adesso te pol gòdertela, vardàndoli ntel ritrato e te pol star sicura che no ghe manca né de magnar, né de bever e anca, i ze al querto dela piova e del fredo! — el ghe ga dito Felin.
La galina la ze stata mesa imbambia dela maniera che Felin el ghe ga mostrà i pitini e, ogni volta depì la se convinsea che Felin no’l zera mia un omo de ciaparse indrio; par gnente nol saria un omo sior e de poder. La se ga straniada anca de veder che sti pitini i zera tuti del medésimo color, bianchi, e dela medésima età, parché quei che i nassea de ela quando l’era in casa de Cesco, i zera un difarente de l’altro — negri, bianchi, maciolai, rossi, gialdi, grisi, in fine, de tuti i colori.
La pensea in tra de ela stessa che, se el gal de somensa che, dele volte Felin el ghe lo portea ntela caponara, el fusse sempre el medésimo e bianco, alora, i pitini i podaria esser crie de ela ma, al pi dele olte, el gal de somensa l’era rosso, negro o griso. Granfati che no ghe nassesse al manco un per de pitini de altri colori!
Ma, fósseli fioi de ela o de altre galine, fursi ntela medésima condission, ela la ghe fea pecà in stesso, parché gnanca no i podea zolar, né corer in quela maniera inmuciai su. Queste le zera state le ùltime fiame de speransa che la galina la gavea impissàde, fursi, gaver un poco de felissità, se anca serada su ntela gàbia. Queste fiame suito le se ga smorsade cola stratègia de Felin de catar sempre na maniera de schivarse de incontentar i desidèrii dela galina. Lu el gavea solche in mente i soldi, de vender ovi e meter via soldi. Quanto depì soldi el gavea lu, pi libertà el gaveva de far le robe che lu el ghe piasea. La libertà dela galina no la ghe interessea mia, parché na galina ze na bestioleta e ghe toca viver in servìssio, conforme l’interesse del so paron, che’l saria paron dela so vita e anca el gavaria el poder de dessider quando e de che maniera la gavaria de morir. Gnanca par darghe de magnar no’l verzea la portela, el ghe lo trea rento par le sfese del stecato dela paura che la ghe scampesse fora.
Fora de coparse, tanti pensieri bruti i ghe vegnea in mente ala galina. La saria bona de morir lotando a sbeconade e sporade contra el paron par scamparghe via. Par parar via la tristessa e la malinconia, pinpianin e soto ose, la subiea la vècia mùsica che Cesco el cantea con la so fémena e i soi toseti. Par la prima volta la se ga fermada a pensarghe sora de quel che diseva la mùsica vantando la dimostrassion de coraio eròico de so antenate galine che, ala Italia, le gavea fato na revolta contra el so paron. Intanto che la subiea la serea i òcii e cola mente la sentia come se i fusse lì darente, Cesco, Indira e i so toseti, che i cantea:
Me Compare Giacometo
El gavea un bel galeto.
Quando el canta el verze el beco
E’l fa pròpio inamorar.
Ma un bel giorno la parona,
Par far festa a’invitadi,
La ghe tira el col al galo
E la lo mete a cusinar.
Le galine tute mate
Par la pèrdita del galo
Le ga roto el capunaro
Dela ràbia che le ga. |
