Del libro: Grigialda Galina Contadina -Capìtolo 6

El lagardo Papogialdo, alora,  con pecà de sta galina che l’era condanada a,  fursi, morir lì dentro, serada su ntela caponara, el ghe ga fato na proposta:

— Par un per de mesi, fin che i mei lagardini i deventa lagardoti riforsadi, ti te me dè un ovo al di e mi te giuto a scampar fora de sta preson!

— Scampar? Ben che lo volaria, ma go proà spacar queste colone de ocalito, ma le ze de cerno e no me giova sforsarme, e par rosegarle col beco me volaria un beco de asso par che no’l se fruesse! — la ghe spiega, trista, la galina.

— Mi posso giutarte, se te voi! — serca de farghe coraio el Papogialdo.

— Come cossì? — se manifesta, sempre dubiosa, la Grigialda.

— La me idea saria che te me dessi tuti i ovi e anca un poco de farina dela to rasson a mi. El paron, vedendo de che no te fe pi ovi, el scominsiarà a ingrassarte par vénderte al frigorìfico! — el aprofita el lagardo, par valutar el so aiuto.

— Fin prima te bastea i ovi, adesso te vol anca farina? — la ghe risponde, sfeduciosa, la galina.

— Te pol fidarte! No ghe ze rason par la to sfedùcia galina, l’e che, noantri lagardi, semo tuti poareti e slanchi, e par poder giutarte ne bisogna forsa e bona salute. Tute le sere noantri vegnemo qua e ti te ne dè i ovi e te sfrassi fora dela farina par noantri magnar e riforsarse, tanto par la fameia dei lagardi, cossì anca par quela  dei rati, che no i magna ovi, ma i ghe piase tanto la farina! — ghe spiega nantra volta, persoasivo, el lagardo.

— E par cossa la to preocupassion coi rati? — ghe domanda Grigialda.

— I rati i ze soldati del me piano, sensa de lori no ghe ze fuga! — el ghe taca Papogialdo.

La idea del lagardo no ghe parea de tuto despresìbile, ma podaria esser che el lagardo el fusse nantro imbroion ancora pi grando del paron Gatoran, ma tuto quel che el lagardo Papogialdo el ghe gaveva dito fin adesso, pareva gaver un fondo de verità e anca tanta coerensa.

— El me piano l’è infalìbile! — el ghe da garansia, Papogialdo.

In poche parole el ghe ga spiegà el piano, che in sìntese, l’era che ntel di che rivaria el camignon par menar via la galina, i rati e i lagardi i restaria de sentinela. El camignon el riveva sempre al fresco, una ora vanti s-ciarir el di.

— Con na vis-ciada, quando el camignon spunta su ntela voltada dela incrosiliada del monte, ciamemo i rati che i vaga tuti  a rosegar le colone de ocalito che tien su la gàbia. Noantri, lagardi, urtemo le colone in banda e verdemo na sfesa granda e ti te vegni fora. Nte na zolada te ciapi la scapoera. Co riva el camignon, cosa càteli? Verta la caponera, mìlio, ovi e farina par tera! Cossa càtito del me piano? — ghe domanda el lagardo.

— Sémpio, ma fursi genial e sicuro! — ghe dise, amirada, Grigialda.

— O morir, o fidarte de mi! No te ghè gnente de perder, fursi, solche de guadagnar, mia vera? 

La galina, alora, la scomínsia a assar là de magnar, par vegner magra par passarghe ntela sfesa che i lagardi i verdaria; perder peso par poder deventar pi legera e sguelta de corer e zolar par scampar. Dopo de questo di, tuti i so ovi la ghe li dea ai lagardi, che i vegnea bei grassi a ogni di che passea.

El lagardo, alora, el ga sercà de pareciar tuto quel che ghe ocorea par esecutar el piano a qualunche momento.

El paron Felin el se ga incorto suito che la galina no la feva pi ovi, e alora, el scomìnsia darghe de magnar in dópio, par che la vegnesse ben grassa da vender. La galina, alora, la ghe tochea sfrassar fora un mùcio de rasson tuti i di, e l’era na festa granda tute le sere par i rati e i lagardi.

Felin el ga visto anca che con pi magnar che’l ghe dea,  pi slanca la deventea, ma no el se gavea incorto che i rati romai i se someieva a porcheti in grassa, e i lagardi romai i zera deventai grandi come i zacarè.

Stufo cole spese sensa risultado, el paron dopo de un per de besteme, el ciama el camignon del frigorìfico e el ghe dise che el voleva vender la galina. Felin el gavea prèssia e ghe bisognea far de svelto, prima che la galina la ghe morisse, parché el sospeteva  che la fusse magagnada, e cossì el feva, sempre che qualche béstia la mostresse qualche segnal de malatia. Par sodisfar a Cesco el ghe portaria là una galina morta drio spussar par che no el lo maledissesse o el ghe cobresse qualche indenisassion.

La fameia dei rati la zera ben organisada, ghera el paron che’l li spartia in trupete de mesa dùsia e ogni trupeta col so lider, e tuti i se  comportea d’acordo con le òrdine del so comandante o dele decision coletive ntele reunion che i fea na volta a la stimana, de note, rento la grota dela toca dele rapose, soto la radisona smarsa dela mariamola.

Ghera un rato destinà al servìssio secreto de informassion, sempre de prontidon, che el scoltea tute le telefonade che el paron el fea e el ricevea.

Sto rato el ga fato un ‘gato’ par scoltar el Gatoran. Come se dise in brasilian, un ‘gato’ l’é un grampo ntel fil del telèfono par scoltar in scondion quel che i altri i parla. I gati i se ofendea quando qualchedun ciamesse Felin de Gatoran, parché li paragonea a un omo rugno, e lori no i se considerea  rugni come lu. EI rato el ga rosegà el plàstico del fil e’l ga messo su un echipamento vècio che’l gavea rangià par scoltar le ciàcole del paron. Così el riussiva saver de tuto, dela vita del paron, l’ora che’l ndea dormir, chi rivea de vìsita, quando el se ausentea de casa, e così i podaria far el bacan sensa paura de esser ciapadi in flagrante e, prinsipalmente, par saver che tipo de velen par i rati el comprea.

El paron el se gavea incorto de un baruio strànio quando el zera al telèfono e el gà ciamà un tènico dela compagnia de telecomunicassion a far na vistoria, na perìssia. El ténico el ga sercà, proà, sfrugnà e no’l ga catà gnente, e el ghe ga dito che l’era l’umidità ntel fil che passea soto tera. L’era pròpio soto tera che el ratin el gavea fato el so laoro par no esser scoperto né par el paron, né par i cagni.

I gati del Gatoran i zera tuti mansi come le piégore. I gavea perso el stinto de caciar rati, parché Felin el ghe portea casa tuti i di, sestonade de pitini morti dei aviàrii par lori magnar. Cossì i ze deventadi grossi, grassi e pegrissiosi. I fea fin fadiga móverse. No i ghe fea gnanca caso ai rati. I ga fato amicìssia coi gati, e dele volte, i dormia insieme. Ghera fin ratini che i ciucea ntele le tete dele gate. L’era parquela che Felin el comprea velen par copar i rati, ma i rati, dopo de due tre ratini bauchi esser invelenadi, i se ga fati furbi. Scoprindo la marca del velen, quando el lo incomendea, i ghe fea la varda ndove lo scondea, e un rato ndea far el ricognossimento. El ghe portea via un graneto de velen par far dimostrassion ai altri rati che, co i catesse sto graneto, se anca l’era tanto gustoso e de odor bon da magnar, l’era un tradimento, un ingano che ghe costaria la vita. In pochi minuti, dopo magnà el velen, ghe s-ciopeva le vene dei rati e i moriva sgionfi de emoragia interna.

Nte una de queste telefonade, el rato el ga scoltà el paron ndar in teso col frigorìfico, marcando ale quatro e mesa dela matina par vegner cargar su la galina.

Questo l’era el di ‘D’. El piano del lagardo el se meteria in esecussion: o tuto o gnente, o la vita o la morte, o la libertà o la preson!