Che son vegnesto de na fameia poverina no go mai bio vergogna da dir. Na sessantina de ani indrio la povertà fea pi difissile la vita che ai di de ncoi. Bisognea sovrivere dele racolte in colònia perche no ghenera i aiuti che ncoi ghenè. Co no vegnia la piova ntea giusta ora e mesura par le piantaion, o che vegnia la tompesta che in tera tuto butea, o qualche malatia che trea per tera quel che se piantea, o anca el bestiame che se slevea, l’era segnal de carestia e mancansa de tante cose.

Ma tra tante cose una che mai vao desmentegar l’è che a la matina bonora, dopo levar su dei leti dopo na note de riposo, se stea na mesa oreta a bever el simaron che’l pòro pupà el prontea e se se scambiea la cuia par tuti beverlo. El pupà e la mama davanti el fogon e noantri, par scaldarse, sentai nte na bancheta de legno dadrio el fogon. Pi de na olta intanto che se lo bevea se brustolea fete de polenta o anca rodele de patate dolse per magnarle nte quel momento o ntea colassion. Sianca el tempo el passa, questi bei momenti i resterà nte un canton dea me memória, che dele olte i me vien in mente, come dolsi ricordi de un tempo che no tornerà più e che li gavarò de portarmeli insieme a l’altro mondo quando la me ora rivar, da quale no go mia paúra, perche de quela li nissun gavarà come scampar quando la va vegnir. Sia sior o poverin, no la dassa nissun scampar e gnanca scònderse.

 Luiz A. Radaelli – Lajeado - RS