 « Voltar
Ncoi se copa el mascio
Ancò se copa el mas’cio
la caliera xe parecia bea
la slusega parfin
soto xe impissà un fogo
de quei grandi
l’aqua xe drio bojare
la fuma che xe un piasere
i tosi xe ‘nadà a scola
par non vedare
co i lo copa
i rivarà co xe ora de farlo su
le femane ga parecià
la poenta sue bronse
el vin novo in te le bosse
el formajo che spissega
el pan biscoto
le scarlogne in te l’asedo
i omeni ga fame co i lavora
le ga anca meso su el disfrito
par consare i bigoli
e ‘na galina la boje pian pian
in t’e la pignata
co la punta de peto
i ossi de vaca
un brodetto de quei
che resussita anca i morti
el nono varda
sentà in te la carega
col capelo in testa
el baston in man
nol ghe la fa più
a starghe drio
ghe vegnaria
da fare anca eo
da dire
da dare ordeni
invesse el sta lì
piantà in tea carega
a ricordare quando
so nono el vardava lu
ghe vien da piansare
quase ma nol vol che i lo veda
tuti i core intorno
i se dà da fare
i parecia i corteli
i lissia la tola
che la diventa bianca e neta
che la par l’altare de la Madona
e le tovaje bianche de lissia
e la machina par masenare la carne
che ga prestà el compare
e ghe xe anca lu
el compare
coi so tosi e le femane
che vien a jutare
la parona la varda
la ordina a le spose
la dixe
la disdixe
la fa
la briga
la disfa
e la sposeta nova
la xe là
davanti al staloto
che la varda el mas’cio
la se comove
la pianse de scondon
la ghe vol ben a quela bestia
daromai
la ghe pare un fradeleto
uno de fameja
quante volte la ghe ga portà el paston
el mas’cio la vardava
pareva che’el ghe dixesse grassie
e po’ el magnava de gusto
e desso el xe là
el la varda ancora
ma nol vede el paston
el vede solo che la pianse
pare ch’el capissa
che xe drio rivare ‘na tragedia
ma nol sa che la xe sua ‘sta tragedia
par la fameja la xe festa
eco
xe ora
riva el mas’ciaro
el tira fora le so robe
da la valisa
el se varda intorno
tuti tase
i varda incantà
solo el nono el parla
el ghe domanda al mas’ciaro
come che sta so papà
ch’el vegneva par casa
‘sti ani
a copare el mas’cio
queo risponde
el varda l’argano
la caldiera co l’aqua che boje
el fogo che va alto
el pignaton par la sangueta
el controla i corteli
e po’ el dixe che se pol scominsiare
i omeni va in tel staloto
par parar su el mas’cio
la sposeta xe ancorà là
la vede che i riva
e la scapa tegnendo un fassoleto su i oci
el mas’cio la varda
nol capisse
ancò gnente paston
e po’ se verse la porta
vien rento do omeni
i vol pararlo fora
ma xe fredo fora
i ghe mete ‘na sorga in tel colo
i lo strassina
lu nol vol
nol vol
el vol solo la sposeta col paston
e dopo un tira e mola
el riva ne la corte
quanta gente ghe xe là
anca gente mai vista
cossa xe che i fa qua?
el vede uno co un cortelo
che ghe va rente
che bruti oci ch’el ga
el voria scapare
el serca de destrigarse
ma el pesa massa
nol ghe la fa
che bruti oci
el mas’ciaro ghe va rente
sempre più rente
poro mas’cio
desso el ga capio
dove xe la tragedia
el siga
el urta
el se smissia
ma tuti che lo tien
el vede ‘na roba che slussega
davanti ai so oci
ghe par de vedare un tocheto de cielo
come da la finestra del staloto
xe el cortelo
desso no lo vede più
dove xe che i lo ga messo?
el sente che i ghe liga le sate da drio
co una soga grossa
che i lo tien streto
e po’ un dolor
dolor grando sul colo
el vol scapare
el prova
nol pol
el se move tuto
rabià
infogonà
el siga
el siga ch’el se sente
fin in piassa
ma daromai nol ghe la fa più
a moverse
gnanca a sigare
e pian pian
el se distende
xe mejo dormire desso
el dorme
par sempre
vien fora el sangue
el sbiansa
el fuma
el impiena el pignaton
le femane core
a ciapare la pignata
par portarla in cusina
i omeni tira su el mascio
el se scorla ancora un pocheto
po’ i lo mete in tel caldieron
par broarlo
i ghe rassa via i peli
i xe duri
e va ben cussì
i li mete da ‘na parte
po’ i lo tira su da novo
in alto che tuti i lo vede
varda che beo
che graso ch’el xe
che lardo bianco che se vede
i lo verse par longo
i ghe cava el pantasso coi buei
da na parte anca quei
i xe boni par i saladi
qua no se buta via gninte
e po’ el figà
la coradela
i rognoni che xe rento al so grasso
el core che’l xe ancora caldo
anca i can gira in tondo
i snasa roba bona
e i sbava
e i sbaia
po’ el mas’ciaro
el taja el porseo in do tochi
riva el veterinario
el varda el figà
la coradea
el core
el tol su un tocheteo de carne
par le analisi
el scrive ‘na carta
el ciapa su el va via
da naltro mas’cio
e desso con delicatessa
i omeni i ciapa le do medene
del poro mas’cio
e i le porta rento
i le posa sul tolon
el mas’ciaro tira fora i cortei giusti
el se mete a tajare
con perissia
competensa
i altri i varda
i sta larghi
el cava el radeseo
par dargheo a le femane
po’ el fa tanti tochi
le brasole da na parte
e le costine
e i tochi più grosi
el fileto
al fileto riva el prete
el pasava par caso
quel tocheto el ghe va a lu
ch’el xe deicato
el ringrassia
el beve un goto de vin novo
el snasa el disfrito
el varda el brodeto
el benedisse tuti quanti
anca le brasole
con devossion
el ringrassia da novo e po’ el saluda
el fa un scapon dopo co xe ora
del figà col radeseo
e dei radeci
i torna a lavorare
i taca a masenare
par i saladi e le soprese
e le luganeghe
un poca de la pasta del salado
subito par le femane
le ga da consare i bigoi
insieme al disfrito
el fogo el xe impissà
in tel fogolaro
tuti ride
xe sodisfassion sto mas’cio
qua se magna par un bel toco
i ciapa i buei neti
i li impiena de carne masenà
col sale
el pevare
un pocheto de salnitro del spissiale
i liga testa e culo
i pica via saladi soprese e luganeghe infilà
ghe xe ancora meso mas’cio da fare
ma xe ora de ‘ndare a tola
xe rivà anca i putei
i ride contenti
i core
i siga
i se senta so
davanti al piato
insieme co la fameja
par le onoranse funebri
de ch’el poareto
del mas’cio benedeto
Vanni Poli – Vicenza - Itália
|
