I VECI

 I veci i va via, romai.

 Pian  pian, squasi de nascondòn.

 Forse semo ndati  a catarli poco

 anca quando che  i gera manco veci.

 Luri  invesse i o fazeva, de vegnerme a catare;

 magari i portava calcossa:

 un biscoto, na botilia, na 's-cianta de ua.

 Calcossa.

 Queo che i gheva.

 I portava el so core.

 I veci romai i me scampa,

 e i me assa qua

 a diventare a nostra volta

 pian pian veci.

 Forse scomissiaremo, magari prima de essare veci,

 a ndare a catare

 quii che vegnarà poco a catarme.

 Mi voearìa ciaparli brassocòeo tuti, chii veci là,

 e spàndare sol so paetò smarìo

 lagrime de pentimento

 par essare ndato poco a catarli,

 i veci.

 Ma queo che me fa pi màe

 ze el fato che luri i me perdonarìa sens’altro,

 de no essare  ndato tanto a catarli.

 I me dizarìa che cussìta  a fa a vita,

 che a fa sercare ai zòvani i zòvani

 e desmentegare i veci,

 anca quii col core zòvane.

 Ma 'ncora de pi ze tremendo pensare

 che anca mi  i pardonarò, chii zòvani là,

 parchè cussìta a fa a vita.

Mariano Sartore

Cartigliano - Vicenza - Itália