Par impissar el fogo bisogna gaver qualche bronse o qualcosa altro che faga vegner na falìva de fogo. Par sta falìva tanti anca i disse “saeta” la pol vegner anca dei fuminanti e sora questo vui recontar quel che ga sucedesto na olta, ntea casa dea zia Catina. La so casa no la stea mia tan distante del paese e n’di i se ga ciapà sensa gnente par impissar el fogo. Suito la se mete a brontolar col so omo, el Piero che, par colpa dea caciassa el se gavea desmentegà de comprar i fuminanti ntea venda del compare Isidoro, nel sabo de sera co el ze nà zugar la brìscola co i so compagni. E come far? Bisognea far el disnar e nol vegnaria fora sensa fogo.

La ciama el Náni, so fiol pi zovano par chel nessa tor sti fuminanti ntea botega del Bernardo che stea mia tan distante. Come lera massa sbirbo la ghe racomanda de no far dispeti in volta e chel compressa la scàtola de fuminanti che gavea la figura del osel ciuciafiori, perche quei la savea che i zera boni. Sto toso el ciapa el capel, l’mete su le sinele, el va e el ritorna de tuta carrera. Co lè rivà a casa squasi ghe manchea el fià de tanto svelto chel ze nà e suito el va portarghe i fuminanti a so mama. La ghe domanda se i zera de quei boni e lu svelto ghe dise che la podea restar pacifica perche col zera pena fora dea venda el gà proà e tuti i se gà impissà. Dopo sentirlo dir ste parole a la Catina ghe ze vegnesto su le fumane, la ze ndata in afano, la ciapa na pignatela e la ze nada tor de impresto arquante bronse ntea casa de so comare Angelina. Come se pol veder, i birbanti, strambi e birichini i ze tanti e sparidi par cuesto grando mondo de Dio.

Autore: Luiz A. Radaelli – Lajeado - RS