I vèci.

Vui dassar n’vero strucon de man, el mio vero saluto, n’saluto de  rispeto a tuti i nostri vèci che leze ste righe che scrivo ntea léngoa taliana, nó solche par chi l’è talian, ma anca par i tedeschi, polachi, braziliani, spagnoli o sia qualche sia la so origine étnica. I se mèrita el nostro rispeto perche lori i ga fat la so parte ntea vita e co la età la se slonga sicuramente tanti dei nostri vèci i patisse de qualche magagna: fursi la salute no la ze mia tanto bona, la memória la scampa, vien la tremarola ntei brassi, man e ntee gambe, fursi i perde la capacità de moverse, de  parlar, de pensar e i perde la tramontana nel trascorso del tempo. Co riva a sto punto bisogna gaver passiènssia par rispetarli ntea condission de vita che i se trova.

Bisognemo rispetarli ncoi perche se Dio el ne dà la gràssia, doman o dopo anca noantri saremo vèci, alora bisognemo semenar ncoi par pi avanti far la racolta de quel che semenèn ntea nostra vita e esser rispetadi ntea nostra veciaia. Come dizea la nona Pierina: mai coltivar spini ntea strada che se vol caminar. Savè che questa racomandassion la ze na gran virtù e no l’è mia tute le persone che pol onorarse de gaverla, par quelo l’è mèio verzer el cuor par no gaver disgusti e dolori co diventaremo vèci anca noantri.

Autore: Luiz Agostinho Radaelli – 14/07/2024